Le profit de l’un est dommage de l’autre

Demades Athenien condemna un homme de sa ville, qui faisoit mestier de vendre les choses necessaires aux enterremens, soubs tiltre de ce qu’il en demandoit trop de profit, & que ce profit ne luy pouvoit venir sans la mort de beaucoup de gens. Ce jugement semble estre mal pris ; d’autant qu’il ne se fait aucun profit qu’au dommage d’autruy, & qu’à ce compte il faudroit condamner toute sorte de guain. Le marchand ne faict bien ses affaires, qu’à la débauche de la jeunesse : le laboureur à la cherté des bleds : l’architecte à la ruine des maisons : les officiers de la justice aux procez & querelles des hommes : l’honneur mesme & pratique des Ministres de la religion se tire de nostre mort & de noz vices. Nul medecin ne prend plaisir à la santé de ses amis mesmes, dit l’ancien Comique Grec ; ny soldat à la paix de sa ville : ainsi du reste. Et qui pis est, que chacun se sonde au dedans, il trouvera que nos souhaits interieurs pour la plus part naissent & se nourrissent aux despens d’autruy. Ce que considerant, il m’est venu en fantasie, comme nature ne se dement point en cela de sa generale police : car les Physiciens tiennent, que la naissance, nourrissement, & augmentation de chasque chose, est l’alteration & corruption d’un’autre.

Nam quodcunque suis mutatum finibus exit,
Continuò hoc mors est illius, quod fuit antè.